Din se tkun l-ewwel darba li Malta se tieħu sehem fil-Biennale tal-Korea t’Isfel, avveniment stabbilit bħala wieħed mill-ewlenin tal-arti kontemporanja fl-Asja.
Il-Ministeru għall-Kultura, l-Artijiet u Gvern Lokali flimkien mal-Kunsill Malti għall-Arti, żvelaw uffiċjalment il-parteċipazzjoni uffiċjali ta’ Malta f’żewġ pjattaformi ewlenin tal-arti internazzjonali – il-Biennale tal-Arti ta’ Venezja u l-Biennale ta’ Gwangju tal-2026.
Din se tkun l-ewwel darba li Malta se tieħu sehem f’dan l-avveniment fil-Korea t’Isfel, li huwa stabbilit bħala wieħed mill-ewlenin tal-arti kontemporanja fl-Asja. Dan tħabbar waqt avveniment imtella’ fil-Malta International Contemporary Art Space (MICAS).
Fid-diskors tiegħu waqt l-avveniment, il-Ministru għall-Kultura, l-Artijiet u l-Gvern Lokali Owen Bonnici enfasizza li l-parteċipazzjoni ta’ Malta tirrifletti wkoll il-kalibru għoli tal-artisti Maltin u kemm il-preżenza tagħhom fuq stadju globali dejjem qed tikber. Il-Ministru Bonnici saħaq li d-debutt ta’ Malta fil-Biennale ta’ Gwangju jimmarka pass importanti fl-espansjoni tal-impronta kulturali nazzjonali lil hinn mill-Ewropa, u jafferma mill-ġdid l-impenn tal-gvern fit-twiżin tat-talent lokali fuq stadju internazzjonali. Huwa faħħar lill-Kunsill għad-dedikazzjoni kontinwa tiegħu fit-trawwim tas-settur artistiku.
Dr Luke Dalli, il-Kap Eżekuttiv tal-Kunsill Malti għall-Arti, stqarr li l-parteċipazzjoni ta’ Malta f’Venezja, u d-debutt tagħha fi Gwangju jirriflettu impenn sħiħ biex tiġi sostnuta l-eċċellenza artistika u tissaħħaħ il-preżenza kulturali tal-pajjiż fuq stadju globali. Huwa rrimarka li dawn il-proġetti jinkorporaw sens ta’ responsabbiltà u fl-istess ħin ambizzjoni, kif ukoll it-tlaqqigħ ta’ artisti, kuraturi u produtturi li xogħolhom iwessa’ l-konfini waqt li jiftaħ spazji ġodda għal djalogu internazzjonali.
Il-61 edizzjoni tal-Biennale ta’ Venezja se jkollha t-titlu In Minor Keys, u hija kkurata mill-mibkija Koyo Kouoh. Din it-tema, magħżula minn Kouoh infisha tesplora l-ispazji fi ħdan il-‘minor keys’ fil-mużika, b’fokus fuq l-aspetti poetiċi, sensorjali, u etereali li ħafna drabi huma marbuta magħhom.
Il-Padiljun ta’ Malta, bit-titlu No Need to Sparkle; Experiments in Love and Revolution, se jkun ikkurat minn Margerita Pulè u huwa maħluq mill-artisti Adrian MM Abela, Charlie Cauchi u Raphael Vella. Il-Padiljun se jittella’ bejn id-9 ta’ Mejju u t-22 ta’ Novembru, u se jwieġeb għar-realtajiet tal-lum billi jħaddan l-idea ta’ Aristotli ta’ ‘dubju għaqli’ – tfakkira li d-dubju jista’ jkun forza attiva u reżistenti. Ix-xogħol jieħu lill-udjenzi f’fizzjonijiet b’saffi diversi, jiddevja stejjer u jdewweb narrattivi, iqanqal riflessjoni aktar profonda dwar il-verità, il-perċezzjoni u s-sistemi ta’ twemmin – temi li jallinjaw mal-ambizzjonijiet kulturali usa’ ta’ pajjiżna.
Fil-proċess tal-għażla għall-Padiljun ta’ Malta kien hemm involuti Dr Katya Micallef (Kap Kuratriċi tal-Arti Moderna u Kontemporanja ta’ MUŻA), il-Perit Adrian Mamo (Direttur Artistiku tat-Teatru Manoel u l-President tas-Soċjetà Maltija għall-Arti), u Daniel Azzopardi (Direttur Artistiku ta’ Spazju Kreattiv). Il-proċess kien immoderat minn Dr Romina Delia, Kap tar-Relazzjonijiet Kulturali Internazzjonali tal-Kunsill Malti għall-Arti.
“No Need to Sparkle“ huwa mibni fuq firxa wiesgħa ta’ materjali storiċi u kunċettwali, iqiegħed miti, stejjer u midja kontemporanja fuq xulxin, biex jesplora kif nifhmu r-realtà. Kull artist jippreżenta installazzjoni msejsa fuq skrin u multimidjali li tiggwida lill-viżitaturi f’terran inċert fejn dak li jidher reali jsir illużjoni, u ċ-ċertezza tiddewweb f’ambigwità. Il-Padiljun jistedinna nikkunsidraw l-empatija u l-multipliċità qabel it-twemmin definit, u jirrikonoxxi li vuċijiet u perspettivi multipli jistgħu jeżistu ħdejn xulxin,” stqarret il-kuratriċi.
Sadattant, id-debutt ta’ Malta fil-Biennale ta’ Gwangju fil-Korea t’Isfel, li se jittella’ bejn Settembru u Diċembru tal-2026, se jseħħ permezz tal-proġett BEJN / IN-BETWEEN, ippreżentat taħt it-tema tal-Biennale You Must Change Your Life. Ospitat fil-Horanggasy Art Polygon Gallery, it-tim artistiku huwa magħmul minn erba’ artisti kontemporanji ewlenin: Norbert Francis Attard, Sam Alekksandra, Julien Vinet, u Michael Quinton. Toni Attard huwa d-direttur tal-proġett. Infinita, immexxija minn Mark Anthony Sammut se tipprovdi għajnuna b’realtà estiża (XR).
“Il-proġett se jimmappja ekosistema li tiżvolġi bejn Malta u l-Korea permezz ta’ installazzjonijiet immersivi, li se jibdlu l-Padiljun ta’ Malta f’għatba ħajja. Għalhekk, il-Padiljun se joħloq bejn ġdid: sit sagru immaġinat mill-ġdid għall-era ta’ polarizzazzjoni: mhux bħala kenn mit-tensjoni, imma bħala griġjol li fih enerġiji opposti jiġġeneraw id-dawl tagħhom,” spjegaw l-artisti.
Ix-xogħol ta’ Norbert Attard f’ArtPolygon juża lastku biex bih jesplora l-identità Maltija. Il-PONKS’ Rope Temple fil-GlassPolygon joħloq rabta poetika bejn il-Korea u Malta b’versi u ħbula sagri. Ix-xogħol ta’ Quinton fil-BasePolygon joffri interazzjonijiet ta’ ħoss u esperjenzi tranżnazzjonali, li jespandu permezz ta’ workshops u kollaborazzjonijiet kreattivi.
Fil-proċess tal-għażla għall-Padiljun fil-Biennale ta’ Gwangju kien hemm involuti Dusu Choi (Kap tad-Dipartiment tal-Wirjiet tal-Fondazzjoni tal-Biennale ta’ Gwangju), Sean Buhagiar (Direttur Artistiku ta’ Teatru Malta), u Rupert Cefai (Kap Eżekuttiv tal-Fondazzjoni Kreattività). Għal darb’oħra l-proċess kien immoderat minn Dr Romina Delia.
Għal aktar informazzjoni tista’ żżur https://artscouncilmalta.gov.mt.
