5 ta’ Settembru – 5 ta’ Novembru 2026
Horangassy, Gwangju, Korea t’Isfel
Il-Kunsill Malti għall-Arti, bl-appoġġ tal-Ministeru għall-Arti, il-Kultura u l-Wirt Nazzjonali, tal-Ministeru għall-Affarijiet Barranin u Ewropej u tal-Fond għad-Diplomazija Kulturali, qed jikkummissjona l-ewwel parteċipazzjoni ta’ Malta fil-Biennale ta’ Gwangju, waħda mill-aktar pjattaformi prestiġjużi fl-Asja għall-arti kontemporanja.
Il-Biennale se jiftaħ fil-5 ta’ Settembru u jibqa’ għaddej sal-15 ta’ Novembru 2026 f’Gwangju. Issa fis-16-il edizzjoni tiegħu, dan il-Biennale joffri pjattaforma globali għal prattiki artistiċi sperimentali u innovattivi. Din l-edizzjoni, bit-titlu You must change your life u mmexxija mill-artist u kuratur minn Singapore Ho Tzu Nyen bħala Direttur Artistiku, tesplora l-qawwa trasformattiva tal-arti fi żmien ta’ kriżijiet u urġenzi multipli.
Bħala parti minn dan il-mument importanti, il-Padiljun ta’ Malta se jippreżenta BEJN / IN-BETWEEN, kummissjoni artistika ġdida fuq skala kbira li tlaqqa’ flimkien erba’ vuċijiet ewlenin tal-arti kontemporanja mill-gżejjer Mediterranji ta’ Malta u Għawdex: Norbert Francis Attard, PONKS (Sam Alekksandra & Julien Vinet) u Michael Quinton. Flimkien bħala l-Kollettiva BEJN, l-artisti ilhom minn Mejju jwettqu residenza ta’ tliet xhur f’Gwangju, b’ħidma mill-qrib mal-Kunsill Malti għall-Arti fit-tħejjija tal-Padiljun ta’ Malta. L-artisti qed joħolqu installazzjonijiet speċifiċi għall-post li se jiżvolġu f’esibizzjoni kollaborattiva waħda f’Horanggasy, wieħed mill-ispazji ewlenin tal-Biennale. Il-proġett huwa kkurat minn Moon Hyun Jeoung u mmexxi minn Toni Attard.
BEJN / IN-BETWEEN tiżvolġi fi tliet spazji konnessi u bħala “punt ħaj” fejn tinbena konnessjoni bejn Malta u l-Korea. L-installazzjonijiet jibbażaw fuq sensittivitajiet kulturali komuni, inkluża l-enerġija qawwija tat-tradizzjonijiet komunitarji Maltin u s-simboliżmu protettiv li jinsab fil-prattiki spiritwali Koreani.
Minflok ma jerġgħu joħolqu dawn id-drawwiet, l-artisti qed jaħdmu fuq it-tessuti emozzjonali li jinsabu fil-qalba tagħhom – ideat ta’ ġbir, protezzjoni, rivalità, devozzjoni u ħelsien – u jittrasformawhom f’esperjenzi spazjali u sensorji. Il-viżitaturi se jiltaqgħu ma’ ambjenti li jaqbdu s-sensazzjoni li wieħed jinsab sospiż bejn forzi differenti, fejn ir-rabtiet li jinħolqu huma importanti daqs il-konfini li jaqsmu.
L-Artisti
Permezz ta’ sensiela ta’ spazji interkonnessi, BEJN tesplora t-tensjoni, il-poeżija, it-tranżizzjoni, il-ħoss, il-moviment u l-interazzjoni diġitali. BEJN jippreżenta l-ewwel padiljun nazzjonali ta’ Malta bħala laqgħa li tevolvi bejn artisti, tradizzjonijiet u teknoloġiji, fejn l-ispazju intermedju jsir post ta’ kreattività, konnessjoni u reżonanza.
Fil-Poligonu tal-Arti, Norbert Francis Attard, wieħed mill-pijunieri tal-arti kontemporanja f’Malta, joħloq intervenzjonijiet spazjali li jżommu forzi konflinġenti f’tensjoni. Ix-xogħlijiet tal-arti tiegħu, ispirati mit-tradizzjonijiet tal-festi Maltin, b’ċelebrazzjonijiet vibranti fi ħdan il-komunità ddedikati lill-qaddis padrun ta’ villaġġ, u mill-prinċipji ta’ kulur Obangsaek Koreani, jesploraw il-bilanċ permezz tal-kuluri, l-elastiċità, id-dawl u l-istrutturi. Attard juża lasktijiet stirati, uċuħ b’mirja, elementi mdawlin u forom arkitetturali tal-metall u bihom jittrasforma l-ispazju f’żona ta’ moviment, pressjoni u riflessjoni. Pereżempju, PERISTYLE, skultura penetrabbli mibnija minn sezzjonijiet tal-metall vojta minn ġewwa u forom miżbugħa kulur id-deheb li jfakkru lill-ispettatur fit-tiżjin tal-festi, tpoġġi ċ-ċelebrazzjonijiet ritwali direttament kontra l-qerda kontemporanja u b’dan il-mod, toħroġ paralleli skomdi bejn il-kultura storika ta’ assedji ta’ Malta, il-kommemorazzjonijiet kollettivi, u l-kunflitti internazzjonali li għaddejjin bħalissa.
PONKS jittrasforma l-Poligonu tal-Ħġieġ f’TEMPJU TAL-ĦBULA fejn mijiet ta’ ħbula sospiżi jiffurmaw kamra ġo kamra. F’nofs it-tempju hemm struttura ta’ ħbula li tixbah lil siġra folta li tikber ’il fuq qalb l-ispazju u b’hekk, tħalli l-għeruq fl-installazzjoni kemm fiżikament kif ukoll simbolikament. Ix-xogħol tal-arti jorbot is-sinifikat ritwali ta’ Geumjul – ħbula sagri tradizzjonali Koreani maħsuba biex ikeċċu l-erwieħ ħżiena – mat-tradizzjonijiet antiki ta’ Malta bil-ħbula, minn bastimenti marittimi sa purċissjonijiet reliġjużi fejn il-ħabel isir kemm ħtieġa funzjonali kif ukoll simbolu sagru. Testi minn poeżiji Maltin u Koreani jgħattu l-ħġieġ tal-madwar u joħolqu ambjent immersiv fejn il-lingwa, il-materjali u r-ritwali jħollu l-fruntieri kulturali fissi. Il-viżitaturi jitilgħu ’l fuq permezz tal-istruttura qisha siġra lejn intervenzjoni finali fin-naħa ta’ fuq tal-bini fejn l-installazzjoni tispiċċa f’ġest mudwal imdendel fuq il-belt.
Il-Poligonu Bażi huwa l-għeruq taħt l-art tat-tempju permezz ta’ tlett ikmamar konnessi flimkien li jesploraw aspetti defferenti tal-poeżija: il-mużikalità, il-kliem, u d-dinjiet. Taħt il-Poligonu tal-Ħġieġ, l-ispazju jiżvolġi bħala kontroparti iktar kwiet u introspettiv għall-installazzjonijiet ta’ fuqu. Fl-ewwel kamra, l-ambjent akustiku ta’ Michael Quinton juża rekordings tal-postijiet, liema rekordings ittieħdu f’postijiet f’Malta u fil-Korea u jikkombina l-manipulazzjoni sonika, ir-reżonanza, is-silenzju u l-ħsejjes immersivi tal-madwar. Ix-xogħol tal-arti jittratta l-ħoss bħala kundizzjoni tal-eżistenza u joħloq ambjent ta’ smigħ profond u ta’ riflessjoni.
Barra minn hekk, il-programm tal-Portall jospita skambju bejn artisti Maltin u Koreani li jagħmlu l-performances tagħhom f’postijiet varji u jistieden lill-udjenzi fid-dinjiet viżwali u għat-tweġibiet personali tal-poeti u tal-performers f’relazzjoni mal-ambjenti tagħhom. L-aħħar kamra hi ddedikata lil antroloġija: pubblikazzjoni sperimentali li tiddokumenta l-proċess kreattiv, il-kontribuzzjonijiet poetiċi u l-iskambji artistiċi u li toffri lill-viżitaturi “framment” tanġibbli tal-bejn sabiex jieħduh magħhom.
Horangassy – Il-post għall-Padiljun ta’ Malta fil-Biennale ta’ Gwangju
Norbert Francis Attard. Ritratt minn Edward DeGabriele.
PONKS. Ritratt minn Edward DeGabriele.
Michael Quinton. Ritratt minn Edward DeGabriele.
Għal mistoqsijiet mill-midja jekk jogħġbok ibgħat email fuq: [email protected]
Kunsill Malti tal-Arti
Kumpless TG Suite 1,
Livell 1 Triq il-Birrerija,
Żona 3, Central Business District,
Birkirkara CBD 3040
Għal mistoqsijiet mill-midja internazzjonali, jekk jogħġbok ikkuntattja lil:
Pelham Communications
Milly Carter Hepplewhite: [email protected]
Rel Hayman: [email protected]
Lucy Groom: [email protected]
