Skema ta’ Appoġġ għat-Taħriġ u l-Iżvilupp

• L-Ewwel Fergħa tappoġġa l-iżvilupp professjonali kontinwu ta’ artisti, operaturi kulturali u studenti Maltin jew ibbażati f’Malta li jkunu attivi fis-setturi kulturali u kreattivi u li jixtiequ jieħdu taħriġ professjonali tul żmien qasir biex itejbu l-ħiliet tagħhom u javvanzaw fl-ispeċjalizzazzjoni tagħhom.

• It-Tieni Fergħa tappoġġa l-iżvilupp u l-esponiment ta’ artisti żgħażagħ Maltin jew ibbażati f’Malta li jkunu attivi fis-setturi kulturali u kreattivi. Il-fond jappoġġa opportunitajiet ta’ taħriġ tul żmien qasir li jtejbu, bla ma jissostitwixxu jew jissussidjaw, il-programm ta’ taħriġ attwali tal-istudenti. Tappoġġa wkoll il-parteċipazzjoni tal-kreattivi żgħażagħ fi pjattaformi internazzjonali, fosthom iżda mhux biss, kompetizzjonijiet, esibizzjonijiet u/jew prestazzjonijiet.

Il-programm jirrifletti tendenza lejn aktar professjonalizzazzjoni fis-settur kulturali u kreattiv u l-promozzjoni ta’ kultura imprenditorjali fost il-professjonisti kulturali. Jipprovdi opportunitajiet biex jissaħħu l-bażijiet tal-għarfien u l-istrateġiji tal-impriżi kulturali u kreattivi. Permezz tal-investiment fi proċessi maħsuba biex itejbu l-kwalità meħtieġa ħalli jiġi ġġenerat xogħol artistiku eċċellenti, l-għan tagħna huwa li nappoġġaw l-iżvilupp ta’ ekoloġija kreattiva sostenibbli biex b’hekk nipprovdu valur miżjud u opportunitajiet ta’ impjiegi fis-settur.

L-għanijiet tal-Ewwel Fergħa (minn 18-il sena ‘l fuq) huma li:

• Tappoġġa l-iżvilupp professjonali kontinwu tal-artisti u tal-operaturi kulturali fl-esplorazzjoni, fl-iżvilupp tal-ħiliet, fil-bini ta’ networks u fl-involviment f’kollaborazzjonijiet nazzjonali u internazzjonali.
• Trawwem l-eċċellenza fl-oqsma tal-arti u l-kultura u l-avvanz tal-għarfien u tal-kapaċitajiet f’oqsma relatati.
• Tinvesti fit-taħriġ u żżid l-opportunitajiet għall-artisti u għall-professjonisti kreattivi.
• Tħeġġeġ l-iżvilupp intellettwali professjonali u l-produttività.
• Tħeġġeġ lill-professjonisti kreattivi jkomplu jiżviluppaw il-ħiliet tagħhom u jieħdu sehem fi pjattaformi fil-livell nazzjonali u internazzjonali.

L-għanijiet tat-Tieni Fergħa (bejn 8 snin u 17-il sena) huma li:

• Tappoġġa l-iżvilupp u l-mobbiltà tal-kreattivi żgħażagħ permezz ta’ opportunitajiet ta’ taħriġ, esplorazzjoni, networking u involviment f’kollaborazzjonijiet internazzjonali.
• Tħeġġeġ u tagħmilha eħfef għall-kreattivi żgħażagħ li jespandu l-ħiliet tagħhom u jinvolvu ruħhom b’mod attiv fi pjattaformi internazzjonali.
• Tippermetti l-esponiment tat-talent żagħżugħ għal pjattaformi internazzjonali
• Tiffaċilita n-networking ma’ artisti internazzjonali oħra.

L-Iskema ser tappoġja l-attivitajiet li ġejjin:

• Korsijiet ta’ taħriġ
• Korsijiet qosra
• Sessjonijiet ta’ ħidma
• Masterclasses
• Internships
• Apprendistat
• Residenzi tal-artisti
• Job Shadowing
• Provi għall-istituzzjonijiet edukattivi
• Provi għall-proġetti artistiċi
• Networking

Min jista’ japplika?

L-applikanti jistgħu jkunu:
• Gruppi, kollettivi u konsorzji
• Organizzazzjonijiet volontarji iskritti mal-Kummissarju għall-Organizzazzjonijiet Volontarji.
• Professjonisti kreattivi/artisti individwali.

L-Ewwel Fergħa hija miftuħa għal professjonisti kreattivi, organizzazzjonijiet jew gruppi attivi fl-arti jew studenti li diġà jkun qed jirċievu taħriġ f’qasam kreattiv jew artistiku. Fil-każ tal-istudenti, il-programm propost għandu jkun relevanti għall-istudji tagħhom. Madankollu dan m’għandux jissostitwixxi jew jifforma parti mill-programm ta’ taħriġ formali jew informali tagħhom. Il-benefiċjarji għandu jkollhom tmintax-il sena jew iżjed.
It-Tieni Fergħa hija miftuħa għal artisti żgħażagħ eċċellenti li sad-data tal-iskadenza tas-sejħa inkwistjoni jkollhom bejn 8 snin u 17-il sena u li jkunu diġà qed jirċievu taħriġ f’qasam artistiku jew kreattiv. Il-programm li japplikaw għalih għandu jkun fl-istess linja ta’ tali programm ta’ taħriġ u jikkumplimentah. Il-kreattivi żgħażagħ taħt it-18-il sena jkollhom bżonn formula ta’ kunsens iffirmata mir-rappreżentant legali tagħhom li tindika b’mod ċar l-isem u n-numru tal-karta tal-identità ta’ mill-inqas ġenitur jew kustodju wieħed.
L-applikazzjoni għandha timtela u titressaq mill-benefiċjarju tal-għotja, iżda fil-każ ta’ minorenni l-isem u n-numru tal-karta tal-identità tal-ġenitur jew kustodju tal-applikant għandhom jiġu inklużi mad-dokumentazzjoni ta’ sostenn. L-applikazzjonijiet aċċettati jinħarġilhom kuntratt f’isem il-ġenitur jew kustodju.

Titolu tal-Arti, Isem tal-Artist, SSSS