Il-Ministru għall-Kultura, l-Artijiet u l-Gvern Lokali Owen Bonnici, flimkien mal-Kunsill Malti għall-Arti, nieda skema ġdida li se tnaqqas l-ispiża tas-self bankarju għas-soċjetajiet mużikali Maltin u Għawdxin. Din l-iskema, li għaliha ġew allokati €280,000, ġiet maħsuba sabiex tagħti lill-każini l-għodda biex iwettqu titjib essenzjali, rinnovazzjonijiet meħtieġa u proġetti li jgħinuhom isaħħu r-rwol tagħhom fil-komunità.
Permezz ta’ din l-iskema, soċjetajiet mużikali li jiddeċiedu li jieħdu self minn bank kummerċjali jkunu jistgħu jibbenefikaw minn sussidju annwali li jkopri 50 fil-mija tal-imgħax dovut fuq self approvat mill-bank. L-appoġġ huwa kkalkulat fuq ammont massimu ta’ self ta’ €500,000 u jista’ jingħata għal massimu ta’ għaxar snin konsekuttivi.Is-sejħa tħaddem sistema ta’ first come first served sas-17 ta’ Novembru 2026, jew sakemm il-fondi jiġu allokati kollha.
Is-soċjetajiet mużikali li raw is-sede tagħhom tinxtara mill-Gvern sabiex jiġi evitat żgumbrament minħabba s-sitwazzjoni legali tal-liġijiet tal-kera ta’ qabel l-1995 mhux se jkunu jistgħu jibbenefikaw minn din l-iskema.
Il-Ministru Owen Bonnici tenna, “Is-soċjetajiet mużikali Maltin għandhom tradizzjoni twila ta’ servizz kulturali, u ħafna minnhom qed ikomplu jinvestu f’faċilitajiet moderni, edukazzjoni mużikali u inizjattivi fil-komunità. Permezz ta’ din il-miżura qegħdin innaqqsu l-pressjoni li joħolqu l-imgħaxijiet għoljin meta dawn jiġu biex jieħdu self minn bank kummerċjali u nwettqu l-wegħdiet ta’ dan il-gvern biex insaħħu l-istrutturi kulturali b’mod prattiku u responsabbli. Dan il-pass jgħin lill-każini jippjanaw b’aktar ċertezza, u fl-istess ħin jiżgura li jibqgħu parti attiva mil-ħajja kulturali ta’ Malta.”
Dr Luke Dalli, iċ-Chairman Eżekuttiv tal-Kunsill Malti għall-Arti, saħaq li din l-iskema se tnaqqas b’mod sinifikanti l-piż finanzjarju fuq il-każini tal-banda meta dawn jiġu biex jieħdu self minn bank kummerċjali, filwaqt li toffri l-flessibbiltà meħtieġa biex dawn l-għaqdiet ikomplu jissaħħu. Huwa spjega li billi jitħalla iktar spazju fil-kaxxa tal-każin, il-każini jkunu jistgħu jinvestu b’aktar serjetà fl-infrastruttura tagħhom, fir-rinnovar, fil-ħidma kulturali u fit-tfassil ta’ pjan fit-tul li jsaħħaħ il-futur tas-settur mużikali u komunitarju f’pajjiżna.
Jistgħu japplikaw biss organizzazzjonijiet volontarji iskritti mal-kummissarju tal-organizzazzjonijiet volontarji li huma konformi mal-liġi dwar il-volontarjat, li jikkwalifikaw bħala każini tal-banda jew soċjetajiet mużikali u li għandhom self approvat mill-bank jew li jinsabu fil-proċess li jiksbu wieħed.
Il-baġit totali tas-sessjoni huwa ta’ €280,000, u l-perjodu eliġibbli għall-imgħax fuq is-self jifrex bejn l-1 ta’ Jannar 2026 u l-31 ta’ Diċembru 2035.
Għal linji gwida u kriterji ta’ eliġibbiltà, żur https://artscouncil.gov.mt.
