L-iskema tipprovdi appoġġ finanzjarju fil-forma ta’ għotja lil entitajiet awdjoviżivi indipendenti biex jiżviluppaw u jipproduċu produzzjonijiet awdjoviżivi kulturali mmexxija mill-kwalità.

L-Iskema ta’ Appoġġ għall-Iskrin għandha tipprovdi appoġġ finanzjarju għal produzzjonijiet kulturali inklużi proġetti ta’ animazzjoni, dokumentarji, finzjoni, u programmi kulturali. Hija għandha l-għan li tiffaċilita l-ħolqien ta’ xogħlijiet eliġibbli, maħsuba għal ħruġ teatrali, festivals u xandir (inklużi pjattaformi VOD/SVOD), li huma kkunsidrati li jagħtu kontribut validu għall-espressjoni tal-kreattività u l-kultura u huma prodotti skont standards internazzjonali.

Jista’ jingħata appoġġ lill-applikanti eliġibbli għall-involviment tagħhom f’koproduzzjonijiet internazzjonali (bħala sħab maġġoritarji jew minoritarji) sakemm l-applikazzjoni tiġi sottomessa mill-applikant eliġibbli u jkun hemm ftehim ta’ koproduzzjoni fis-seħħ (skont l-istandards tal-industrija). Il-proġetti għandhom juru kooperazzjoni artistika u/jew teknika bejn l-imsieħba tal-koproduzzjoni.