Din is-sejħa għal proġetti taħt l-Iskema ta’ Appoġġ għall-Arti għandha l-għan li tappoġġja inizjattivi – minn artisti, prattikanti kulturali u kreattivi u komunitajiet – li l-objettiv tagħhom huwa l-promozzjoni u t-twettiq ta’:
Drittijiet Kulturali (Il-Kultura u s-Saħħa)
Id-drittijiet kulturali huma d-drittijiet ta’ kulħadd li jaċċessa, jipparteċipa u jgawdi l-kultura, il-wirt kulturali u l-espressjonijiet kulturali
Għal aktar tagħrif dwar id-drittijiet kulturali u l-prattiċi tajbin, u għal pariri u għodod utli, tista’ tirreferi għall-manwal Dritt għall-Kultura | Right to Culture, ippubblikat mill-Kunsill Malti għall-Arti.
Dritt għall-Kultura huwa disponibbli f’verżjoni stampata u onlajn, bla ħlas, kemm bil-Malti kif ukoll bl-Ingliż, hawnhekk, u wkoll fil-format ta’ audiobook, kemm bil-Malti kif ukoll bl-Ingliż, hawnhekk.
Proposti mressqa taħt din is-sejħa huma mistennija jindirizzaw primarjament benessri olistiku aħjar.
Id-dritt għall-kultura huwa l-pedament tal-Istrateġija 2025 tal-Kunsill Malti għall-Arti, miġbura fil-mantra “Isma’. Oħloq. Imraħ.” Il-kampanja ta’ sensitizzazzjoni tad-Dritt għall-Kultura tal-Kunsill Malti għall-Arti hija inizjattiva bil-għan li tgħin lin-nies:
• Jimpenjaw ruħhom permezz tal-kultura u l-arti
• Jesploraw narrattivi diversi
• Jilħqu l-potenzjal kreattiv tagħhom
L-Iskema ta’ Appoġġ għall-Arti tifforma parti mill-portafoll ta’ appoġġ tal-Kunsill Malti għall-Arti, li jinvesti fil-mainstreaming tad-dritt ta’ kulħadd li jaċċessa, jipparteċipa u jgawdi l-kultura, il-wirt kulturali u l-espressjoni kulturali, filwaqt li jirrikonoxxi l-kultura bħala spazju għall-espressjoni u l-kreattività, kif ukoll bħala mutur tal-inklużjoni, l-ekwità u l-benesseri.
Il-benesseri
Din is-sejħa tematika tenfasizza b’mod partikolari fuq id-drittijiet kulturali u l-kontribut tal-arti u l-kultura għall-benesseri olistiku.
Għall-finijiet ta’ din is-sejħa, il-benesseri huwa mifhum bħala kunċett multidimensjonali li jinkludi s-saħħa fiżika, mentali, emozzjonali, soċjali, kulturali u ambjentali. Jirrifletti fuq li l-individwu u l-komunitajiet ikunu jistgħu jgħixu b’dinjità, jinvolvu ruħhom b’mod sinifikanti ma’ oħrajn, jaċċessaw opportunitajiet għat-tkabbir, u jipparteċipaw bis-sħiħ fis-soċjetà – inkluż permezz tal-espressjoni u l-esperjenza kulturali.
Il-promozzjoni tad-dritt għall-kultura bħala pilastru tal-benesseri olistiku tfisser li jiġi żgurat li n-nies kollha, irrispettivament mill-isfond, l-identità, jew iċ-ċirkostanza, ikollhom aċċess ekwu biex joħolqu, jinvolvu ruħhom u jikkontribwixxu għall-kultura u l-arti. Dan jivolvi t-tneħħija tal-ostakli strutturali, l-amplifikazzjoni tal-vuċijiet sottorappreżentati, u t-trawwim ta’ ekosistemi kulturali inklużivi u parteċipattivi.
Permezz ta’ din is-sejħa, il-KMA qed ifittex li jappoġġja inizjattivi li jużaw il-qawwa tal-kultura u l-arti bħala mezz biex jagħtu s-setgħa lill-komunitajiet, irawmu s-sens ta’ appartenenza, u jsaħħu l-qawwa tal-kultura fil-bini ta’ komunitajiet ġusti, inklużivi u li qed jirnexxu.
Objettivi:
• L-appoġġjar ta’ prattiki li jtejbu l-aċċess għall-kultura u l-impenn artistiku għal individwi u komunitajiet f’riskju ta’ esklużjoni jew marġinalizzazzjoni;
• L-inkoraġġiment ta’ prattiki li jorbtu l-parteċipazzjoni kulturali ma’ riżultati mtejba ta’ benesseri fis-saħħa, l-edukazzjoni, u l-koeżjoni tal-komunità;
• Il-promzzjoni tad-drittijiet kulturali u d-diversità permezz tal-espressjoni artistika, il-kultura, u d-djalogu;
• Il-possibbiltà għal approċċi kollaborattivi u trans-settorjali li jgħaqqdu l-għanijiet ta’ żvilupp kulturali u soċjali;
• It-tisħiħ tar-rwol tal-arti u l-kultura fil-ħajja pubblika, b’mod partikolari f’kuntesti ta’ kura, saħħa mentali, u reżiljenza soċjali.
Dan il-mekkaniżmu ta’ appoġġ jikkonsisti f’żewġ oqsma ta’ fokus ewlenin, kull wieħed maqsum fi tliet tipi ta’ attivitajiet. L-applikanti jistgħu jagħżlu li jiffokaw f’qasam wieħed jew aktar minn dawn jew f’tipi ta’ attivitajiet fi ħdan il-proġetti tagħhom:
1. Prattika artistika u/jew riċerka, jiġifieri:
• Proġetti artistiċi – inklużi l-produzzjoni u l-ipprogrammar ta’ xogħol kreattiv ta’ kwalità għolja – li jwessgħu l-fruntieri tal-involviment ta’ esperjenzi kreattivi għall-artisti, il-professjonisti kulturali u kreattivi, is-setturi relevanti u l-komunitajiet;
• Produzzjoni u/jew riċerka li jirrelataw mal-komunitajiet artistiċi ta’ Malta, imfassla biex jiddokumentaw il-legat kulturali u artistiku ta’ Malta b’mod miftuħ u sostenibbli.
2. Involviment tal-komunità u l-udjenza, jiġifieri:
• Produzzjoni artistika u/jew programmar li tagħmel possibbli u tippromwovi l-parteċipazzjoni kulturali, l-espressjoni kreattiva, u/jew l-għarfien u l-apprezzament relatati mal-memorja kollettiva, u l-legat kulturali u artistiku tal-komunità;
• Esplorazzjoni ta’ approċċi innovattivi u parteċipattivi għall-involviment tal-udjenza li jwasslu biex japprofondixxu l-involviment ma’ udjenzi eżistenti u ġodda permezz ta’ prattika u/jew riċerka artistika;
• Esplorazzjoni ta’ modi biex itejbu l-aċċess għall-arti u biex jippromwovu parteċipazzjoni inklussiva u diversità akbar fi ħdan l-arti.