Il-Fond tal-President għall-Kreattività huwa wieħed minn sensiela ta’ inizjattivi mmirati lejn it-tisħiħ tal-inklużività, tal-iżvilupp tal-komunità u tal-benessri permezz tal-parteċipazzjoni kulturali u tal-espressjoni kreattiva. Dan il-fond jappoġġa proġetti u programmi. Il-fond jifforma parti minn portafoll divers ta’ skemi u inizjattivi li jimmassimizza l-potenzjal tat-tkabbir kreattiv ta’ Malta billi jħeġġeġ l-involviment fis-setturi kulturali, jiffaċilita l-iskambju kulturali u jippromwovi d-drittijiet kulturali. L-applikazzjonijiet jistgħu jfittxu appoġġ għal inizjattiva pilota jew għall-iżvilupp ta’ inizjattiva li l-organizzazzjoni tkun diġà ppruvat u ttestjat.

Il-potenzjal tal-espressjoni kreattiva fit-trawwim tal-bidla u tar-riġenerazzjoni soċjali u kulturali ntwera u ġie ppruvat f’għadd ta’ kuntesti, inklużi dawk ikkaratterizzati minn ambjenti soċjalment diffiċli, mill-faqar u mill-esklużjoni. Dan il-fehim hu l-bażi għall-Fond tal-President għall-Kreattività.

Il-fond jipprovdi rikonoxximent u appoġġ fl-ogħla livell tal-Istat għal inizjattivi eċċitanti mibnija fuq il-valuri tal-ekwità, id-diversità, l-inklużività u s-sostenibbiltà fis-settur tal-kultura u l-arti u fis-settur soċjali rispettivament – speċjalment dawk li jaħdmu ma’ gruppi żvantaġġati – biex jinvolvu lill-gruppi fi proġetti kreattivi u mmexxija mill-arti u jżidu l-livell ta’ integrazzjoni u involviment tagħhom fis-soċjetà.

Il-Fond tal-President għall-Kreattività hu marbut mal-implimentazzjoni tal-istrateġija kontinwa tal-Kunsill Malti għall-Arti, b’enfażi partikulari fuq il-promozzjoni tad-drittijiet kulturali u l-għoti ta’ aktar opportunitajiet lin-nies biex jinvolvu ruħhom fl-espressjoni kreattiva.

Il-fond hu speċifikament marbut ma’ prijoritajiet importanti artikulati fl-istrateġija kontinwa tal-Kunsill, jiġifieri, li jinvesti f’dawn illi ġejjin:

• Spettru usa’ ta’ xogħol ta’ kwalità li jispira skambju kulturali fil-komunità u jinvolvi firxa usa’ ta’ nies, kemm bħala parteċipanti kif ukoll bħala udjenza.
• Artisti u organizzazzjonijiet li jippromwovu d-diversità kulturali u jittrattaw l-inklużjoni u l-aċċessibbiltà kulturali.
• Il-promozzjoni tad-drittijiet kulturali.

Il-fond jifforma parti mill-programmi ta’ finanzjament tagħna għall-iskambju komunitarju li għandu l-għan li jinvesti f’dawn li ġejjin:

• Żieda fil-parteċipazzjoni kulturali f’Malta u f’Għawdex;
• Fehim u involviment aħjar bejn l-artisti u l-komunitajiet;
• Żieda fid-diversità fil-programmazzjoni kulturali;
• Żieda fl-importanza mogħtija lil kultura li tkun ferm aktar rappreżentattiva tas-soċjetà Maltija inġenerali;
• Żvilupp sostenibbli.

Il-Fond tal-President għall-Kreattività għandu l-għan li:

• Jappoġġa organizzazzjonijiet u istituzzjonijiet li jaħdmu favur il-bżonnijiet soċjali u l-benessri tal-komunità, b’mod partikulari gruppi żvantaġġati u dawk li diffiċli jintlaħqu, b’enfażi speċjali fuq it-tfal, iż-żgħażagħ, l-anzjani, il-persuni b’diżabbiltà u persuni minn sfondi etniċi differenti, permezz tal-parteċipazzjoni kulturali u tal-espressjoni kreattiva.
• Jipprovdi lil gruppi żvantaġġati aċċessibilità għal firxa wiesgħa ta’ esperjenzi artistiċi ta’ kwalità u attivitajiet ta’ involviment fl-arti u jaġixxi bħala pjattaforma għal talent żagħżugħ promettenti u għal djalogu interġenerazzjonali kif ukoll interkulturali.
• Jinċentiva l-kontribut ta’ organizzazzjonijiet attivi fis-settur tal-arti u l-kultura lejn l-iżvilupp tal-komunità u proġetti kollaborattivi tal-arti.

Dan il-fond jipprovdi appoġġ għall-iżvilupp ta’ proġetti, programmi u prattiki kollaborattivi mfassla biex irawmu d-diversità, l-ekwità, l-inklużjoni, l-appartenenza, il-benessri u r-riġenerazzjoni permezz tal-impenn kulturali. Jinvesti wkoll fil-kollaborazzjoni bejn organizzazzjonijiet attivi fis-settur kulturali u kreattiv u fil-qasam tal-iżvilupp soċjali u komunitarju. L-applikazzjoni għandha turi b’mod ċar il-benefiċċji tal-proġett għall-komunità.

Is-sieħeb ewlieni jista’ jikkollabora ma’ organizzazzjoni waħda jew aktar u/jew ma’ prattikant individwali wieħed jew aktar biex jiżviluppa proġett, programm jew prattika tal-arti komunitarja li tgħaqqad l-ogħla standards ta’ kwalità u l-prattika tajba, kemm mill-perspettiva artistika kif ukoll mill-perspettiva soċjali.

B’mod konformi mal-Istrateġija 2025 u mal-impenn tal-KMA li jappoġġa l-arti, jiġifieri li jadotta approċċ sostenibbli u responsabbli għall-investiment pubbliku:

Inħeġġu lill-applikanti jqisu bis-sħiħ u kif xieraq il-prinċipji spjegati fid-Dritt għall-Kultura – Pakkett ta’ Riżorsi, b’mod partikulari fir-rigward tal-involviment tal-komunità u tal-adozzjoni ta’ approċċ ibbażat fuq id-drittijiet għax-xogħol tagħhom. Dan il-pakkett ta’ riżorsi għandu l-għan li jżid l-għarfien dwar l-inklużività u jappoġġa l-implimentazzjoni tad-drittijiet kulturali fil-prattika tagħna ta’ kuljum.

L-applikanti mistennija wkoll iqisu bis-sħiħ u kif xieraq il-prinċipji deskritti fil-Karta għall-Istatus tal-Artisti biex jiżguraw kundizzjonijiet tax-xogħol ġusti għall-artisti billi jħaddnu l-libertà artistika, l-aċċessibbiltà, ir-rikonoxximent tal-ħiliet formali/informali/mhux formali, kundizzjonijiet soċjoekonomiċi xierqa, in-nondiskriminazzjoni u l-ekwità, kunsiderazzjonijiet etiċi dovuti u r-rispett tad-drittijiet tal-proprjetà intellettwali u l-liġi internazzjonali tax-xogħol. Il-Karta għall-Istatus tal-Artisti tipprovdi qafas ta’ referenza dinamiku għal-leġiżlazzjoni, il-politiki u l-inizjattivi li b’mod dirett jew indirett jolqtu lill-artisti u lis-setturi kulturali u kreattivi filwaqt illi tiżgura li l-azzjonijiet meħuda jkunu allinjati mal-viżjoni aħħarija fit-tul li jiġi elevat l-istatus tal-artisti u tal-ħaddiema kulturali fil-Gżejjer Maltin skont il-valur tagħhom fis-soċjetà.

Il-Fond tal-President għall-Kreattività huwa ġestit b’mod konġunt mill-Uffiċċju tal-President tar-Repubblika u mill-Kunsill Malti għall-Arti.