Fil-qalba tal-festival ta’ din is-sena hemm l-esebizzjoni From Illustration to Book – inizjattiva mtella’ b’kollaborazzjoni kontinwa bejn il-Kunsill Nazzjonali tal-Ktieb (KNK) u l-Kunsill Malti għall-Arti (KMA). Din l-esebizzjoni tittratta fil-fond il-vjaġġ kreattiv wara l-illustrazzjoni tal-kotba, twessa’ l-perspettivi u tenfasizza l-arti diversa involuta.
Għall-ewwel darba t-taqsima ‘Illustration Today’ fetħet il-bibien tagħha għal sottomissjonijiet internazzjonali permezz tan-netwerk EUNIC u żiedet diversità rikka ta’ vuċijiet kreattivi. Taqsima ġdida bit-titlu ‘From Idea to Illustration’ ser tinkludi abbozzi u tpinġijiet preliminari u toffri lill-udjenzi ħarsa rari lejn l-istadji bikrija tal-illustrazzjoni u tal-evoluzzjoni tar-rakkont viżwali tal-istejjer.
Ser tiġi esebita wkoll wirja speċjali ta’ disinji ta’ qoxriet ta’ kotba organizzata mill-Komunità Maltija tal-Illustraturi (MCOI) b’kollaborazzjoni maċ-Ċentru għall-Edukazzjoni u r-Riċerka Ambjentali (l-Università ta’ Malta), bl-appoġġ tal-KMA, il-KNK u Gutenberg Press. Il-qoxriet ta’ din is-sena jiffukaw fuq it-tema tas-sostenibbiltà. L-artisti hawnhekk jimmaġinaw kif tista’ tidher Malta fi żmien 20 sena kieku kull għażla, deċiżjoni u politika ambjentali tittieħed b’mod responsabbli. Din il-viżjoni ta’ ġejjieni sostenibbli tenfasizza r-rwol tal-arti u tal-letteratura fit-tmexxija tal-bidla soċjali u ambjentali. Ser jintwerew ukoll selezzjonijiet mill-Illustration Annual 2024 tal-MCOI.
It-taqsima ‘Artist Spotlight’ ser tonora lill-illustraturi Maltin Frank Schembri u Moira Zahra u tiċċelebra l-istili influwenti u l-kontributi tagħhom għax-xena lokali tal-illustrazzjoni.
L-Eżekuttiv tal-Edukazzjoni u l-Iżvilupp fil-Kunsill Malti għall-Arti Nikki Petroni esprimiet is-sodisfazzjon tal-KMA fil-kollaborazzjoni mal-KNK fuq l-esebizzjoni From Illustration to Book filwaqt illi affermat mill-ġdid l-impenn tal-KMA li jipprovdi lill-artisti opportunitajiet biex jiġi ċċelebrat ix-xogħol tagħhom. “Bħala KMA naħdmu biex nagħtu lill-artisti kull opportunità possibbli biex ix-xogħol tagħhom jiġi apprezzat filwaqt illi nenfasizzaw waħda mill-prijoritajiet tal-Istrateġija 2025, jiġifieri l-apprezzament usa’ tal-arti,” irrimarkat Petroni.
“Il-KNK bi pjaċir qiegħed jippreżenta edizzjoni oħra tal-esebizzzjoni From Illustration to Book li issa saret punt fokali ewlieni tal-Festival Nazzjonali tal-Ktieb,” qal il-Kap Eżekuttiv tal-KMA Mark Camilleri. “Din il-wirja mhux biss tagħti spinta viżiva innegabbli lill-esperjenza tal-Festival iżda hi wkoll impenn lejn l-unur tal-artisti kollha li jtejbu l-prodott letterarju tagħna. Kruċjalment hi wkoll eżempju ċar tal-benefiċċji li jirriżultaw meta żewġ entitajiet bħall-KNK u l-KMA jikkoperaw lejn il-ksib ta’ għan komuni,” qal Camilleri.
Bħala l-karatteristika ċentrali tal-Festival Nazzjonali tal-Ktieb 2024 l-esebizzjoni From Illustration to Book hi eżempju tar-rwol tal-festival fiċ-ċelebrazzjoni tal-intersezzjoni tal-letteratura, l-arti viżiva u l-kultura. Dan l-avveniment annwali jibqa’ parti vitali mill-kalendarju kulturali Malti, jappoġġa t-tkabbir artistiku, irawwem l-imħabba għall-qari u jinkuraġġixxi lill-udjenzi biex jesploraw il-ħafna forom li jista’ jieħu r-rakkont tal-istejjer.
Għall-programm sħiħ u l-aħħar aġġornamenti jekk jogħġbok żur www.artscouncil.mt, is-sit web tal-KNK jew segwi l-paġna Facebook tal-Festival Nazzjonali tal-Ktieb 2024.
