Ħarsa Ġenerali
It-Taqsima tal-Films Domestiċi fi ħdan il-Kunsill Malti għall-Arti qiegħda toħroġ sejħa miftuħa għas-sottomissjonijiet għal Wirja ta’ Films Qosra Maltin magħżula li se tiġi ppreżentata fis-Suq tal-Films Qosra f’Clermont-Ferrand, li se jsir f’Clermont-Ferrand, Franza, bejn l-1 u l-4 ta’ Frar 2027, waqt id-49 edizzjoni tal-Festival Internazzjonali tal-Films Qosra ta’ Clermont-Ferrand.
Is-Suq tal-Films Qosra f’Clermont-Ferrand huwa l-avveniment ewlieni tal-industrija għall-films qosra. Billi jgħaqqad il-wiri fiżiku tal-films fis-suq ma’ pjattaformi diġitali tal-industrija, iservi bħala s-suq globali għall-bejgħ, l-akkwisti, il-koproduzzjoni u l-liċenzjar ta’ films qosra fit-territorji Ewropej u internazzjonali. Il-programm tiegħu għall-industrija jrawwem il-kollaborazzjoni kreattiva, iċ-ċirkolazzjoni internazzjonali u l-iżvilupp tan-negozju għaċ-ċinema tal-films qosra.
Din l-inizjattiva tal-Kunsill Malti għall-Arti għandha l-għan li żżid il-viżibbiltà globali tal-produzzjoni kontemporanja ta’ films qosra Maltin, tippromwovi t-talent kreattiv lokali u tagħti spinta liċ-ċirkolazzjoni fis-suq internazzjonali. Il-films qosra magħżula se jiffurmaw programm apposta fejn se jintwerew fis-suq, ippreżentat lil delegati tal-industrija, inklużi aġenti tal-bejgħ internazzjonali, xerrejja, xandara tat-televiżjoni u programmaturi tal-festivals.
Perjodi ta’ Żmien u Dati Ewlenin
L-applikazzjonijiet iridu jimtlew u jintbagħtu sa nhar il-Ġimgħa, it-13 ta’ Novembru 2026 fil-17:00 CET.
Taħt l-ebda ċirkostanza mhuma se jiġu pproċessati sottomissjonijiet li jaslu tard.
Wara l-fażi tal-evalwazzjoni, l-applikanti magħżula se jiġu nnotifikati uffiċjalment bir-riżultati sa nhar il-Ħamis, is-26 ta’ Novembru 2026.
L-applikanti magħżula se jkunu meħtieġa jiffirmaw dokument ta’ aċċettazzjoni fi żmien tlett (3) ijiem tax-xogħol minn meta jirċevuh. Dan id-dokument jikkonferma formalment il-parteċipazzjoni u jagħti lill-Kunsill Malti għall-Arti l-permess u l-awtorizzazzjoni mhux esklużivi għad-drittijiet meħtieġa biex juri l-film qasir fis-Suq tal-Films Qosra f’Clermont-Ferrand 2027, kif ukoll id-dritt li jirriproduċi ritratti promozzjonali, siltiet, krediti u loglines f’pubblikazzjonijiet tas-suq, kampanji ta’ pubbliċità u fil-fuljett uffiċjali tas-suq.
L-applikanti magħżula jridu jibagħtu l-materjal promozzjonali obbligatorju kollu b’riżoluzzjoni għolja u l-krediti għall-fuljett uffiċjali tas-suq, u jgħaddu lill-Kunsill Malti għall-Arti Pakkett Digital Cinema Package (DCP) kompletament konformi u mhux kriptat sa nhar il-Ġimgħa, l-4 ta’ Diċembru 2026 f’12:00 (nofsinhar) CET.
In-nuqqas ta’ osservanza ta’ dawn l-iskadenzi jwassal għat-telf immedjat tal-post miksub fl-għażla, li jiġi riallokat lill-applikant li jkun imiss bl-ogħla punteġġ fil-lista ta’ riżerva.
Eliġibbiltà
L-applikazzjonijiet l-ewwel se jiġu skrinjati għall-eliġibbiltà. Il-proposti li mhumiex eliġibbli skont il-punti t’hawn taħt ma jiġux ipproċessati aktar u ma jiġux evalwati.
Min jista’ japplika?
Biex ikunu eliġibbli, l-applikanti jridu jikkwalifikaw bħala Entità Awdjoviżiva Indipendenti kif iddefinita f’dawn il-linji gwida.
Barra minn hekk, l-applikanti jridu jissodisfaw il-kriterji kollha li ġejjin:
- Mill-inqas kariga waħda ta’ direttur jew il-maġġoranza tal-ishma fl-entità ġuridika jridu fl-aħħar mill-aħħar ikunu f’idejn ċittadini Maltin jew persuni li għandhom status ta’ residenza permanenti f’Malta.
- Ikunu rreġistrati mal-korp regolatorju applikabbli meta jibagħtu l-applikazzjonijiet tagħhom.
- Ikollhom ċertifikat validu ta’ reġistrazzjoni tal-VAT.
- Ikunu l-oriġinatur jew id-detentur primarju tad-drittijiet tal-awtur tal-film qasir imressaq, jew ikollhom id-drittijiet esklużivi sħaħ u l-permessi kollha (inklużi d-drittijiet tal-mużika, tal-filmati arkivjali u tal-interpretazzjoni) meħtieġa biex jissottomettu l-film u jagħtu d-drittijiet għall-wiri u għall-promozzjoni fuq pjattaformi ta’ swieq internazzjonali.
Biex tiġi żgurata rappreżentanza wiesgħa fis-settur Malti tax-xogħol għal fuq l-iskrins, tista’ tintgħażel applikazzjoni għal massimu ta’ film qasir wieħed (1) għal kull Entità Awdjoviżiva Indipendenti taħt din is-sejħa.
Kriterji tal-Eliġibbiltà tal-Films
Il-films qosra ppreżentati jridu jissodisfaw ir-rekwiżiti tekniċi, kreattivi u tal-premiere kollha li ġejjin:
- Il-proġett irid ikun film qasir oriġinali u komplut (finzjoni, animazzjoni, dokumentarju kreattiv jew sperimentali), b’tul massimu ta’ tletin (30) minuta, inklużi l-krediti.
- Il-film qasir irid ikun tlesta bejn l-2024 u l-2026.
Tingħata preferenza lil films qosra li għadhom ma kellhomx premiere f’festival internazzjonali, ħruġ kummerċjali fis-swali taċ-ċinema jew distribuzzjoni permezz tax-xandir/VOD barra minn Malta (l-istatus ta’ film li għadu ma ħariġx). Dan għandu l-għan li jattira xerrejja fis-suq internazzjonali u programmaturi tal-festivals li jagħtu prijorità lil films disponibbli għal premiere.
Minkejja dan, films qosra li diġà kellhom premiere f’festival internazzjonali jibqgħu eliġibbli għas-sottomissjoni u jistgħu jitqiesu għall-inklużjoni fil-wirja, fid-diskrezzjoni tal-evalwatur.
L-applikant irid ikollu, jew ikun f’pożizzjoni li jgħaddi, Digital Cinema Package (DCP) mhux kriptat u konformi mar-rekwiżiti taċ-ċinema u materjal promozzjonali b’riżoluzzjoni għolja sa nhar il-Ġimgħa, l-4 ta’ Diċembru 2026 f’12:00 (nofsinhar) CET.
Portata tal-Appoġġ u Eponiment għas-Suq
Il-films qosra magħżula se jiġu inklużi fil-Wirja uffiċjali ta’ Films Qosra Maltin fis-Suq tal-Films Qosra f’Clermont-Ferrand 2027. Taħt din is-sejħa, it-Taqsima tal-Films Domestiċi fi ħdan il-Kunsill Malti għall-Arti se tipprovdi lill-applikanti magħżula appoġġ mhux finanzjarju fl-oqsma li ġejjin:
- Kopertura sħiħa tal-miżati tas-sala għall-wiri ddedikat għall-films Maltin fis-suq f’Clermont-Ferrand, flimkien ma’ koordinazzjoni mal-operaturi uffiċjali tal-festival dwar id-dħul tal-fajls fis-sistema, l-ittestjar tekniku u l-konfigurazzjoni tal-projezzjoni għal Digital Cinema Packages (DCPs) konformi.
- Id-disinn editorjali, il-pubblikazzjoni u t-tqassim tal-fuljett uffiċjali tal-wirja, li jinkludi ritratti tal-produzzjoni b’riżoluzzjoni għolja, loglines, krediti, il-parteċipazzjonijiet passati f’festivals u d-dettalji ta’ kuntatt dirett għal kull film magħżul.
- Il-tlugħ ta’ profil tal-industrija fuq il-pjattaforma diġitali Shortfilmwire u fuq il-portali online tal-Kunsill Malti għall-Arti, flimkien ma’ kampanji promozzjonali mmirati fl-istampa u fuq il-midja soċjali, indirizzati lejn xerrejja internazzjonali, aġenti tal-bejgħ u programmaturi tal-festivals.
Avviż Importanti: L-appoġġ taħt din is-sejħa strettament mhuwiex finanzjarju u huwa limitat għall-appoġġ imsemmi hawn fuq. Din is-sejħa ma toffrix għotjiet diretti fi flus, akkreditazzjonijiet għas-suq, allowances għall-ivvjaġġar, għall-akkomodazzjoni jew għas-sussistenza ta’ kuljum għall-applikanti magħżula.
Kif Tapplika
L-applikazzjonijiet iridu jintbagħtu kompluti permezz ta’ email lil [email protected] bil-linja tas-suġġett Maltese Short Film Showcase Clermont-Ferrand 2027 Application, sal-iskadenza uffiċjali ta’ nhar il-Ġimgħa, it-13 ta’ Novembru 2026 fil-17:00 CET. L-applikazzjoni trid tkun kompluta biex tiġi kkunsidrata.
Applikazzjonijiet li ma jkunx fihom id-dokumentazzjoni kollha meħtieġa u l-informazzjoni obbligatorja kollha sa din l-iskadenza jitqiesu li mhumiex kompluti, ma jiġux ipproċessati aktar u ma jiġux evalwati.
Biex japplika, l-applikant li jirrappreżenta lill-Entità Awdjoviżiva Indipendenti jrid jissottometti dossier komplut li jkun fih id-dokumentazzjoni obbligatorja li ġejja:
- Dossier tal-Film (PDF): Dokument PDF wieħed li jkun fih:
- It-titlu uffiċjali tal-film (oriġinali u bl-Ingliż), il-ġeneru, it-tul eżatt (mhux aktar minn 30 minuta inklużi l-krediti) u d-data meta tlesta (2024-2026);
- Logline (massimu ta’ 60 kelma) u sinopsi bl-Ingliż, miktuba għall-pubblikazzjoni fil-fuljett;
- Lista sħiħa tal-krediti tal-kast u tal-crew;
- Indirizz tal-email u numru tat-telefown pubbliċi għall-kuntatt, biex jiġu ppubblikati fil-fuljett uffiċjali tas-suq għad-delegati tal-industrija;
- F’liema festivals intwera l-film, lista tal-premjijiet mirbuħa sal-lum, jew dikjarazzjoni espliċita li tikkonferma li l-film għadu ma ħariġx;
- Link online sigura u protetta b’password għall-film qasir sħiħ (Vimeo jew YouTube) b’sottotitli bl-Ingliż, li tibqa’ valida mill-inqas sal-20 ta’ Frar 2027;
- Ritratt wieħed (1) tal-produzzjoni b’riżoluzzjoni għolja, lest għall-pubblikazzjoni (orizzontali, f’orjentazzjoni 16:9, minimu ta’ 300 DPI, f’format JPEG jew PNG);
- Curriculum vitae komprensiva u bijografija professjonali kemm tal-produttur kif ukoll tad-direttur individwali, li jagħtu dettalji tal-krediti preċedenti u tal-esperjenza tagħhom fl-industrija;
- Ritratti tal-wiċċ tad-Direttur u tal-Produttur b’riżoluzzjoni għolja.
- Dikjarazzjoni tal-Eliġibbiltà u Permessi għad-Drittijiet: Kopja mimlija u ffirmata tal-formola uffiċjali tad-dikjarazzjoni hawn, li permezz tagħha l-applikant jikkonferma formalment:
- Is-sjieda jew il-liċenzjar esklużiv tad-drittijiet kollha tal-proprjetà intellettwali, tal-mużika, arkivjali u tal-interpretazzjoni meħtieġa għall-wiri internazzjonali;
- L-għoti lill-Kunsill Malti għall-Arti ta’ awtorizzazzjoni mhux esklużiva biex juri l-film qasir fis-Suq tal-Films Qosra f’Clermont-Ferrand 2027 u jippubblika ritratti promozzjonali, krediti, loglines u siltiet f’pubblikazzjonijiet tal-industrija u fil-fuljett uffiċjali tas-suq;
- Li l-film ikun kompletament lest mil-lat tekniku u l-garanzija li se jingħadda lill-Kunsill Malti għall-Arti Digital Cinema Package (DCP) konformi u mhux kriptat sa nhar il-Ġimgħa, l-4 ta’ Diċembru 2026 f’12:00 (nofsinhar) CET.
Il-Kunsill Malti għall-Arti se jivverifika l-eliġibbiltà tal-applikant, il-klassifikazzjoni tal-kodiċi NACE u r-residenza fiskali permezz ta’ rekords interni u reġistri pubbliċi. Il-Kunsill Malti għall-Arti jirriżerva d-dritt li jitlob aktar dokumentazzjoni ta’ sostenn (bħal Ċertifikat tar-Reġistrazzjoni tal-Kumpanija maħruġ mill-MBR, l-aktar Ċertifikat ta’ Reputazzjoni Tajba reċenti [maħruġ fl-2026], jew estratt tal-klassifikazzjoni NACE) matul il-fażi tal-iskrinjar amministrattiv, jekk ikun meħtieġ. Tali dokumentazzjoni addizzjonali trid tkun disponibbli minnufih.
Sib il-linji gwida kollha [hawnhekk] u d-Dikjarazzjoni tal-Eliġibbiltà [hawnhekk].