Il-Micro Grant hija waħda mill-għodod tagħna biex nindirizzaw u nwettqu l-istrateġija preżenti tal-Kunsill Malti għall-Arti, bil-mira li nrawmu l-potenzjal kreattiv u nappoġġjaw l-iżvilupp tiegħu f’attività professjonali.
Din l-għotja għandha l-għan li tipprovdi struttura ta’ appoġġ li tinkoraġġixxi applikanti ġodda biex jaċċessaw l-investiment pubbliku; u għalhekk hija mmirata lejn applikanti li ma rċivew l-ebda fondi mill-portafoll ta’ fondi tal-KMA f’dawn l-aħħar tliet snin (mill-2023 sal-2025). Il-Micro Grant tippermetti lil artisti individwali u professjonisti kreattivi biex jiżviluppaw xogħol artistiku li jgħinhom jimxu ’l quddiem fil-professjoni tagħhom.
Il-Micro Grant hija għotja ta’ darba mfassla biex tappoġġja elementi ta’ bini ta’ kapaċità bħal servizzi ta’ għajnuna, tagħmir, materjali, u spazju li huma marbutin direttament ma’ proġett, attività jew avveniment li se jittellgħu matul l-iskeda taż-żmien eliġibbli ta’ din l-għotja.
Attivitajiet li huma fi ħdan is-settur kulturali u kreattiv:
- 1. Arti (letteratura, arti viżiva, mużika, arti performattiva, interdixxiplinari);
- 2. Servizzi ta’ Negozju Kreattiv (disinn, arkitettura, turiżmu kulturali u servizzi kulturali);
- 3. Patrimonju (artiġjanat, festivals u ċelebrazzjonijiet tradizzjonali, siti kulturali, antikitajiet
- 4. Midja (materjal ippubblikat u stampat, awdjoviżivi, li jinkludu produzzjoni ta’ film u vidjo, servizz ta’ film, televixin, video games, radju, midja online).
Eliġibbiltà
Qabelxejn, il-proposti jiġu skrinjati skont it-termini tal-eliġibbiltà teknika. Proposti ineliġibbli skont it-termini tal-punti mniżżla hawn isfel ma jiġux ipproċessati aktar u ma jiġux evalwati.
L-iskeda taż-żmien massima biex twettaq il-proġett: 12-il xahar.