Is-setturi kulturali u kreattivi jippreżentaw xenarju ferm inċert ta’ parteċipanti bi sfondi u b’ambizzjonijiet differenti minn dawk tal-kuntesti ekonomiċi, soċjali u kulturali differenti tagħhom. Nirrikonoxxu li l-prattikanti artistiċi, kulturali u kreattivi għandhom ambizzjonijiet li jvarjaw, minn impenji professjonali fis-setturi fuq bażi full-time sas-sostenn tal-prattika tagħhom b’introjtu primarju minn mestier ieħor. Għaldaqstant, permezz tal-investiment, tal-promozzjoni, tal-komunikazzjoni u tal-bini ta’ kapaċità, il-ħidma tagħna ser tiffoka fuq it-trawwim tal-intraprenditorija kreattiva bħala mentalità li twassal għal approċċ iktar sostenibbli u inklużiv. Ser inkunu konxji minn dawn ir-realtajiet fl-appoġġ li nagħtu lill-firxa tal-impenji tagħna mas-setturi kif ukoll tad-definizzjonijiet suġġettivi ta’ suċċess tagħhom. Se nqisu d-distintività li tappartjeni lis-sottosetturi differenti fi ħdan l-ekoloġija kulturali u kreattiva tagħna kif ukoll il-firxa ta’ rwoli, l-input u l-istrutturi fi ħdan il-katina kreattiva ta’ valur. Sabiex nindirizzaw dan l-għan strateġiku, se norbtu ma’ oqsma strateġiċi oħrajn biex niżguraw li jappoġġaw u jagħtu lok għall-intraprenditorija kreattiva.

Biħsiebna nibqgħu kommessi li nelevaw l-istatus tal-artisti u tal-professjonisti billi nippromwovu r-rwol sinifikanti tal-arti u tal-kreattività fil-komunitajiet u billi nitkellmu favur il-libertà tal-espressjoni u l-inklużjoni, it-titjib fil kundizzjonijiet tax-xogħol u l-aċċess ekwu għall-opportunitajiet.

Biex din l-istrateġija tkun ta’ suċċess u komprensiva, se niżguraw li jkun hemm djalogu kostanti u miftuħ ma’ entitajiet oħra li huma direttament responsabbli għas-setturi kulturali u kreattivi ta’ Malta u jirrappreżentaw is-setturi u l-kundizzjonijiet differenti li jsawru x-xogħol ta’ prattikanti u organizzazzjonijiet kulturali u kreattivi. Fost dawn insibu l-Kummissjoni Maltija tal-Films u l-Kunsill Nazzjonali tal-Ktieb. Aħna se naħdmu mill-qrib ma’ dawn l-entitajiet sabiex jitħaffu l-isforzi għall-ġid tas-setturi.